درس رموز بلدي (تاريخ علم مصر) للصف الرابع الابتدائي

درس رموز بلدي (تاريخ علم مصر) للصف الرابع الابتدائي 

 #دراسات_رابعة_ابتدائي

درس #تاريخ_علم_مصر 🇪🇬🇪🇬🇪🇬🇪🇬

مش قادرة افتكر إذا كنا درسنا الموضوع ده قبل كده او لأ الحقيقة بس حبيت أقدمه بشكل ممتع عشان نفضل فاكرينه كلنا 🥰

الدرس بيحكي عن علم مصر ودلالة كل لون من ألوان العلم ودي كانت حاجة لطيفة قوي وهتفتح لنا مجالات حكاوي كتيرة قوي عن التاريخ

يعني لما الطفل يسأل يعني ايه استعمار وليه اللون الأحمر بيعبر عن دم كل حد ضحي عشان بلده ومين هو صلاح الدين الايوبي اللي رمز النسر مرتبط بيه

مش بس كده كمان تاريخ تطور علم مصر بيفتح لنا ابواب تانية عشان نعرف مين محمد علي باشا والخديوي اسماعيل وايه هي ثورة ٢٣ يوليو وحصل فيها ايه الي آخره

الدرس ده مش مجرد حاجة عابرة في تخيلي أن وراه حكايات كتيرة قوي هتيجي بعد كده ☺️

عشان كده كان مهم ما ننساش شكل العلم في المراحل اللي مصر مرت بيها

صممت كروت للاعلام من القديم للحديث زي ما الكتاب ذكرها ولعبنا شوية ألعاب

#أول_لعبة

كانت تطابق الاعلام مع الفترة الزمنية والحاكم

مثلا في فترة حكم محمد علي باشا شكل العلم كان عبارة عن مربع كبير لونه أحمر مرسوم جواه هلال ونجمة 🇹🇷

اتغير شكله في عهد الخديوي اسماعيل وكان عبارة عن مربع أحمر برده بس كان فيه ٣ أهله و٣ نجوم

وهكذا

كل علم ليه قصة وحكاية بس الحقيقة ما اتكلمناش عنه لأنه 

محتاج جلسة خاصة والوقت مش معانا حاليا ☺️

#ثاني_لعبة

كل واحد فينا مسك مجموعة من الكروت كان معايا المدة الزمنية والطفل معاه صورة العلم كنت بحط كارت من معايا والطفل يطلع صورة العلم المناسب.

في ظهر كل كارت كتبت أرقام للتصحيح الذاتي عشان الطفل يصحح لنفسه بعد ما ينفذ النشاط 

#ثالث_لعبة

كان الخط الزمني لتطور علم مصر 🇪🇬🇪🇬

جبنا شريط ستان ورصينا الكروت والاعلام

ممكن الكروت ننفذ بيها افكار تانية كمان زي لعبة الذاكرة مثلا، نعمل بحث عن كل علم منهم ونعرف ليه اختاروا الشكل ده وكل أو رسمة بترمز لإيه

الحلو كمان أن الكروت لعبوا بيها الولاد كلهم مع بعض حتي اللي مش في سنة رابعة وكان عاجبهم فكرة التصحيح الذاتي جدا 🥰

ده لينك تقدروا تحملوا منه الملف وتشتغلوا بيه مع الولاد

من هنا 

وده لينك تاني فيه نشاط اضافي 

حصل تعديل في الملف وضيفنا فيه مفاجأة حلوة ☺️🇵🇸

نزلوا الملف من هنا 👇👇

دمتم في أمان الله 😍❤️

#صفا_أكاديمي