طريقة تقديم جدول الضرب في منهج منتسوري للأطفال

 نشاط جدول الضرب

 وده النشاط اللي نفذناه

اشتغلنا علي table 3 

قدمت جدول الضرب بطريقتين 

  #لوحة_الضرب 

بناخد الجدول من البداية بمعني أننا محتاجين نجيب حاصل ضرب 3×1 هنطبق ازاي علي اللوحة؟

معانا كروت الأرقام مرقمة من 1-10 ومعانا دائرة حمراء اللي بنسميها marker ومعانا الخرز الاحمر اللي بنستخدمه في إيجاد ناتج حاصل الضرب 

اللوحة نفسها عليها ارقام بالطول وارقام بالعرض واحدة اسمها multiplicand والتانية اسمها multiplier بالعربي ترجمتها المضروب والمضروب فيه 

بداية هختار كارت رقم 3 ونحطه في الفتحة الموجودة في جانب اللوحة لان ده الجدول اللي هنشتغل عليه 

احنا محتاجين نكرر ال3 دي مرة واحدة عشان نعرف حاصل ضرب 3×1=.....

هنحرك الدائرة الحمراء ونوقفها عند رقم 1 ونبدأ نرص ٣ من الخرز في أول صف ونعد هنلاقي 3×1=3

نشيل الخرز من علي اللوحة ونرجعه العلبة ونكرر نفس الخطوات لحد ما نوصل ل 3×10=30

نكرر العمليات دي مع الطفل كذا مرة لحد ما يحفظها بشكل كويس ويبقي قادر يقول الناتج لما نسأله عن عملية ضرب معينة.

#بالخرز

اتعرفنا قبل كده في طريقة منتسوري علي الوان الخرز واشتغلنا بيها كتير

رقم 3 لونه بمبا 

هنجيب صندوق الخرز الكبير بتاعنا ونبدا نقول للطفل احنا دلوقتي هنشتغل علي table 3 

بنشتغل بالاوراق المطبوعة أو نكتب المسائل علي ورق 3×1=...

نخرج عمود واحد من الخرز البمبا ونقول له أن رقم 3 مكرر مرة واحدة يدينا كم؟

يدينا 3 ونحط عمود رقم 3 تحتها ونكتب الناتج علي ورقة 3️⃣

المسألة الثانية 3×2=..

معناها نكرر الخرز البمبا مرتين ونحط عمودين جنب بعض ونقول للطفل احنا كده كررنا ال3 مرتين يبقي دول كده كم؟ 

مجموعهم 6 ونكتب الناتج علي ورقة 6️⃣ لحد ما نوصل ل 3×10 ونرص الخرز بنفس الطريقة في الصور ونسجل الناتج علي ورق أو نستخدم كروت مطبوعة 

حبيت نكتب المسألة عشان الطفل يشارك في النشاط ويتعود علي كتابة الارقام 🙂

الأنشطة اللي فوق دي لتعليم جدول الضرب بنكررها مع كل الجداول ونكرر كتير لحد ما يتقن الطفل النشاط.

بعد كده نشتغل بالورقة والقلم 

#نشاط_السلاسل_القصيرة  

من الأنشطة اللي استخدمناها مع كل الارقام عشان نحفظ حاصل ضرب الرقم في نفسه لاننا بنحتاجها كتير زي

 3×3=9

4×4=16 

وهكذا 

وبنستخدم معاها كمان مربعات الخرز  

#أنشطة_إضافية_في_المنتسوري

نشاط المضاعفات والتربيع والتكعيب 

في نشاط #المضاعفات 

بنجيب السلاسل الطويلة الخاصة بالجدول اللي بنشتغل عليه ونرصها ونبدأ نعد ونرص الكروت المدون عليها الارقام.

الهدف من النشاط ده أننا نعمل حاجة اسمها skip counting يعني نعد بال3 ونعرف مضاعفات الرقم عشان هنحتاجها في شغل تاني بعد كده 

في المنتسوري فيه أنشطة بتتقدم بدري شوية بطريقة بسيطة عشان بعد كده بنبني عليها وبنرجع لها تاني 

نشاط ثاني #التربيع

في نفس السلاسل اللي احنا عديناها هنبدأ نضم اول 3 أعمدة جنب بعض ونسأل الطفل دول كده كم ؟ 

نقرأ الكارت هنلاقي الرقم هو 9️⃣ 

هنجيب مربع الخرز البمبا ونحطه فوق السلاسل ونقول للطفل مش دول زي بعض بالظبط يعني ال3 اعمدة لما بنجمعهم مع بعض بيدينا 9 

لو هنعملها في شكل مسألة هتكون 3×3 =9 

نفرد السلسلة مرة تانية ونحط المربع فوق رقم 9

نكرر نفس الخطوة مع ال3 أعمدة التانيين من الخرز ونضمهم علي بعض هنلاحظ برده أنهم عملوا شكل المربع يبقي كده معانا 9 كمان يعني 9 و9 =18 

وهنلاحظ إن الرقم المكتوب فعلا 18

نفرد السلسلة ونحط المربع عند رقم 18 فوق

نكرر نفس الخطوة مع آخر سلسلة هنلاحظ الرقم المكتوب هيكون 27 

الخطوة دي هتدخلنا علي حاجة جديدة وهي #التكعيب 

هنجيب ال3 مربعات ونحطهم فوق بعض هنلاحظ أنهم عملوا شكل المكعب البمبا اللي مجموع الخرزات اللي فيه =27

دلوقتي هنقول

تربيع رقم 3 هو 9 (المربع البمبا)

تكعيب رقم 3 هو 27 (المكعب البمبا) 

زي ما وضحت أن دي أنشطة إضافية وفي نفس الوقت هي كمان تمهيدية هتفيد في شغل ٩-١٢ إن شاء الله 🙂

نكرر الخطوات مع كل جداول الضرب اللي بنشتغل عليها مع الطفل

دمتم بخير 

صفا_أكاديمي

 🙂