درس تحديد موقع مصر الصف الرابع الابتدائي
#تحديد_موقع_مصر
#جغرافيا
في الدرس هنعرف إزاي نحدد موقع مصر علي الخريطة 🗺️
بداية هحتاج اعرف الطفل خطوط الطول ودوائر العرض 🌐طيب هل شرط اني اعمل ده قبل مااقدم الدرس ؟! لا مش شرط ومش من ضمن منهج المدرسة كمان بالمناسبة بس فكرة اني أأقدم منهج الدراسات كمنهج جامد يتحفظ من غير فهم مش محببة خالص بالنسبة لي ومش دي الطريقة اللي هتبقي مناسبة كمان مع أولادي😁😁.
ندخل بقي في الدرس أولا هنجيب كرة أرضية🌍 (استخدمنا كرة المنتسوري) وكشاف🔦 وهنقفل اللمبات هنوجه الكشاف للكرة الأرضية هنلاحظ وجود مناطق فيها إضاءة كبيرة ومناطق الإضاءة بتاعتها أضعف ومناطق مظلمة خالص مش واصل لها ضوء .
هنلف الكرة ونخلي الضوء يسقط علي الجهة الأخري ونلاحظ اماكن الضوء .
هنقول للطفل إن فيه أماكن بيسقط عليها ضوء الشمس🌞 بشكل أكبر من مناطق تانية وفي نفس الوقت اللي بيكون فيه مكان منور علي الكرة الأرضية 🌍 في مكان تاني بيكون مظلم
طيب ليه الفرق ده حصل ؟
ده نتيجة دوران الأرض 🌍 حول محورها
طيب فاكرين أما كنا بنحضر الكورس مع روني وكان بيبقي عندها نهار واحنا ليل ،، ازاي كمان الساعة عندها ٢ وعندنا احنا ٨ ؟
طيب خلينا نعرف السبب من النشاط الجاي
العلماء في يوم من الايام اتجمعوا في مكان وقالوا احنا محتاجين نحدد الوقت عشان نعرف الساعة كام في كل مكان في العالم وده عشان يسهل علينا تحديد أوقات معينة للشغل والنوم والاكل وكل حاجة في حياتنا فقالوا احنا هنفترض إن الكرة الأرضية دي عبارة عن نصين متساوين وتخيلوا خط وهمي بيقسم الكرة الأرضية 🌐 لنصين متساويين والخط ده لقوا انه هيمر من وسط قارة أفريقيا وهيمر باماكن تانية من القارات المجاورة والخط ده سموه #خط_الاستواء ومش بس كده كمان حددوا مدارين واحد فوق خط الاستواء وسموه #مدار_السرطان وواحد اسفل خط الاستواء وسموه #مدار_الجدي (فيه تفصيل اكتر للموضوع ده وأنهم ٥ خطوط بس مش وقتها دلوقتي هنأجلها شوية) وأطلقوا علي كل الدوائر دي دوائر العرض
وبعد ما عملوا الخطوط دي قالوا إن الخطوط دي كلها متوازية يعني عمرها ما هتلتقي مع بعضها
فكروا كمان أنهم يعملوا خط طولي يقسم الكرة الأرضية لنصفين متساويين بالطول ولأن الاجتماع ده كان في أوروبا في بلد اسمها جرينتش سموا الخط ده #خط_جرينتش ولما جربوا يعملوا خطوط كتير من أعلي الكرة لأسفلها لقوا إن الخطوط دي كلها بتتجمع في نقطة عند القطب الشمالي وبتتجمع تاني في نقطة عند القطب الجنوبي فأطلقوا عليها خطوط الطول (حاولوا تبسطوا الجزء ده علي قد ماتقدروا للأطفال) 😊😊
جبنا بعد كده ليمونة 🍋 وقسمناها بالطول عشان أوضح لهم مكان التقاء الخطوط الطولية
ومن الجميل في كرة المنتسوري انها بالفعل مصممة بحيث تكون مقسمه الي نصفين بالعرض ومكان الالتقاء هو خط الاستواء
هنقول بقي للطفل إن درجة الحرارة عند خط الاستواء بتكون عالية جدا عشان كده في ناس بنلاقي بشرتهم لونها اسود شوية (أصحاب البشرة السمراء) وده لان عندهم صبغة الميلانين عالية شوية
كلما ابتعدنا عن خط الاستواء بنلاقي درجة الحرارة بتقل لحد ما نوصل للقطبين الشمالي والجنوبي بنلاقي إن الأشعة اللي واصلة لهم قليلة عشان كده المناطق دي جليدية ويتكون برد جدا
(هنا عملت معاهم نشاط تلوين للمناطق دي زي الصور في البوست )
حددنا دلوقتي خط الاستواء وخط جرينتش وعرفنا المناخ في كل منطقة ايه سببه
طيب من هنا نستنتنج إن مناخ مصر معتدل
بعد كده جبنا البانر وشرائط ستان وحددنا عليه خط الاستواء وخط جرينتش وراجعنا علي الإتجاهات الأربعة الأصلية شمال⬆️ جنوب⬇️ شرق➡️ غرب ⬅️
وكنا تطرقنا للاتجاهات الفرعية قبل كده فذكرناها تاني علي سبيل المراجعة وقفنا في النص عند مكان التقاء الخطين (خط الاستواء وخط جرينتش) وجبنا خيط نحدد بيه مكان مصر بالظبط فين فعرفنا إن مصر موجوده شمال شرق قارة أفريقيا➡️
من الحاجات الجميلة اللي ساعدتنا في الدروس كتاب أطلس العالم من نهضة مصر أسلوبه سهل والولاد يقدروا يقرأوا بنفسهم فيه مع بعض المساعدة
طولنا شوية في الدرس 😂😂
بس كان مهم الولاد يفهموا ازاي طبيعة المناخ☔❄️🌦️🌥️⛈️🌨️🌧️☀️🌡️🌪️🌩️🌀 بتتغير في كل مكان وازاي انا بحدد مكاني من العالم
حاجة إضافية عملناها تتبعنا خطوط الطول ودورنا علي جوجل عن الدول اللي معانا علي نفس خطوط الطول او قريبة مننا ودي البلاد اللي الساعة عندنا زي الساعة عندهم وشوفنا فرق التوقيت🕖🕢🕗🕣 بينا وبين البلاد المجاورة والبلاد اللي لينا فيها اقارب عرفنا هما سابقينا بكم ساعة وليه الدول الأوربية والأسيوية الفرق بينا وبينهم ساعات اكتر وده اللي بيخلي عندهم نهار واحنا ليل أو العكس .
النشاط ممكن يفتح لكم مجالات كتيرة في البحث ومعرفة معلومات أكتر وطول الدرس ممكن تسجلي أسئلة طفلك المتعلقة بالدرس وتدوروا عليها مع بعض عشان تثبت عنده المعلومة اكتر بإذن الله 🥰🥰
تعديل:
حاجة كمان نسيت أضيفها اننا حددنا ايه اللي بيحيط بمصر من الاربع اتجاهات
في الشمال البحر المتوسط
في الشرق البحر الأحمر
في الغرب ليبيا
وفي الجنوب السودان
احنا كده خلصنا النشاط
نراكم في نشاط جديد إن شاء الله
#الدراسات_الاجتماعية
#الصف_الرابع_الابتدائي
تعليقات
إرسال تعليق